काठमाण्डौं । कतार एयरवेज शहिद स्मारक ए डिभिजन लिगमा मनाङ्ग मर्स्याङ्गदी क्लबले हिमालयन शेर्पा क्लबलाई पराजित गरेको छ ।
शनिबार त्रिपुरेश्वरस्थित दशरथ रंगशालामा सम्पन्न दोश्रो खेलमा मनाङ्गले हिमालयन शेर्पालाई १–० गोल अन्तरले हराउँदै लगातार दोश्रो जित दर्ता गरेको हो ।
मनाङ्गको जितमा ओलावाले अफिजले गरेको एक मात्र गोल नै निर्णायक बन्न पुग्यो ।
खेलको ८३औ. मिनटमा पुजन उपरकोटीको कर्नरकिक निशान लिम्बुलाई लागेर फ्ल्कि भएको बलमा अफिजले हेडर गोल गर्दै मनाङ्गलाई स्पष्ट तीन अंक दिलाए ।
जितसँगै मनाङ्ग २ खेलमा ६ अंक जोड्दै अंकतालिकाको शिर्ष स्थानमा उक्लिएको छ । मनाङ्गले पहिलो खेलमा जावलाखेल युथ क्लबलाई १–० गोल अन्तरले नै हराएको थियो ।
अर्काेतर्फ पहिलो जितको खोजिमा रहेको हिमालयनको एक अंक छ । उसले पहिलो खेलमा हिमालयनले संकटासँग १–१ गोलको बराबरी खेलेको थियो ।
खेलको म्यान अफ दि म्याच मनाङ्गका पुजन उपरकोटी घोषित भए ।
आजै सम्पन्न पहिलो खेलमा च्यासल युथ क्लबले नेपाल एपीएफ क्लबमाथि १–० गोल अन्तरको जित निकालेको थियो ।
अब आईतबार एक मात्र खेल हुनेछ जसमा जावलाखेल युथ क्लबले नेपाल पुलिस क्लबसँग खेल्नेछ ।
यो पनि पढ्नुहोस्: एपीएफलाई हराउँदै च्यासलको पहिलो जित
