काठमाडौं । शहिद स्मारक ए डिभिजन लिग क्लब च्यासल युथ क्लबका दुई खेलाडीमा कोरोना भाइरस (कोभिड-१९) को संक्रमण पुष्टि भएको छ ।
जारी कतार एयरवेज शहिद स्मारक ए डिभिजन लिग खेलिरहेको च्यासलका दुई खेलाडी गोलरक्षक प्रदीप भण्डारी र डिफेण्डर कमल श्रेष्ठलाई कोरोना संक्रमण पुष्टि भएको हो ।
प्रतियोगिता अन्तर्गत पोखरा रंगलाशामा भएको घरेलु टोली मनाङ मर्स्याङ्दी क्लबविद्ध आठौं चरणको खेल खेलेर च्यासल गत साता काठमाडौं फर्किएको थियो ।
काठमाडौं फर्किएपछि गरिएको टोलीको कोरोना परिक्षण रिपोर्ट अनुसार दुई खेलाडी कोरोना संक्रमित भएको टोलीका सहायक प्रशिक्षण आशिख थापा मगरले बिहीबार आयोजित प्रि म्याच कन्फ्रेन्समा जानकारी दिएका हुन् ।
यस्तै हाल उनिहरु आइसोलेसनमा रहेका छन् । पोखरा रंगशालामा गत हप्ता भएको आठौं चरणको खेलमा च्यासल घरेलु टोली मनाङसँग ५-० ले पराजित भएको थियो ।
च्यासलले नवौं चरणमा पुलिस सँग खेल्ने छ । जारी लिगको खराब लयमा रहेको च्यासल रेलिगेशनको खतामा रहेको छ । १३ औं स्थानमा रहेको च्यासलले ८ खेलबाट पाँच अंक जोडेको छ ।
१४ क्लबले प्रतिस्पर्धा गरिरहेको लिगबाट यसपटक दुई टोली रेलिगेशनमा पर्दै बी डिभिजन लिगमा घटुवा हुनेछन् ।