राष्ट्रिय खेलकुद परिषद् (राखेप) ले हालै दर्ता खारेज गरेको नेपाल तेक्वान्दो संघका महासचिव दीपराज गुरुङ्गले भारतीय नागरिकहरुलाई कुकिवनको डान सर्टिफिकेट बिक्रि वितरण गर्दै आएको खुलासा भएको छ । गुरुङ्गले भारतीय नागरिकहरुलाई कुकिवनको सर्टिफिकेट दिलाउन नेपाल तेक्वान्दो संघको नाम बेच्दै गैरकानुनी तरिकाले सिफारिस गरेको सर्टिफिकेटमा प्रस्टरुपमा देखिएको छ । यो सत्यतथ्य बाहिर आएसँगै गुरुङ्गले वर्षौंदेखि तेक्वान्दोमा यस्तो गैरकानुनी धन्धा चलाउँदै आएको रहस्यको पनि पर्दाफास भएको छ ।
कुकिवनको डान सर्टिफिकेट प्राप्त गर्न निश्चित प्रक्रिया पुर्याउनु पर्छ । सर्वप्रथम ‘रेड वेल्ट’ हुनुको साथै उक्त ‘रेड वेल्ट’ लिएको कम्तिमा १ वर्ष पुगेको हुनुपर्छ । त्यसपछि मात्रै उसले ट्रेनिङ्गमा सहभागि हुन पाउँछ । ट्रेनिङ्ग निश्चित दिनसम्मको हुन्छ । ट्रेनिङ्ग सकिएपछि परिक्षा हुन्छ, उक्त परिक्षामा ट्रेनिङ्ग लिनेले त्यसमा पास हुनुपर्छ । परिक्षामा पास हुन विशेषगरि पुम्सेको ज्ञान भएको हुनुपर्छ । पुम्सेमा कम्तिमा पनि १ देखि १० नम्बर ल्याउनु पर्छ । साथै किकिङ्ग र बेसिक पनि राम्रो हुनुपर्छ । यसको साथै डेमोस्ट्रेशन र सेल्फ डिफेन्समा पनि राम्रो हुनुपर्छ । यी सबै प्रक्रियामा पास भएपछि मात्रै डानको लागि कुकिवनमा सिफारिस गरिन्छ । महत्वपूर्ण कुरा नेपालले नेपाली खेलाडीलाई मात्र सिफारिस गर्न पाउँछ, विदेशीलाई पाउँदैन् । तर गुरुङ्गले विदेशी नागरिकको लागि सिफारिस गरेको प्रस्टरुपमा देखिएको छ ।
यो कुराले महासचिव दीपराज गुरुङ्गले नेपाल तेक्वान्दो संघको नामबाट भारतीय नागरिकहरुलाई कुकिवनको सर्टिफिकेट प्रदान गर्न नियम विपरित कार्य गरेको प्रमाणित गर्छ । यसरी गुरुङ्गले एकै वर्षमा भारतीय नागरिकहरुलाई सयौंको संख्यामा कुकिवन सर्टिफिकेट बिक्रि वितरण गर्दै लाखौं रुपैयाँ लुम्ल्याउँदै आएको देखिन्छ । प्राप्त जानकारीका अनुसार एक कुकिवन सर्टिफिकेटको लागि गुरुङ्गले भारतीय नागरिकहरुबाट ५ हजार देखि १५ हजार भारतीय रुपैयाँ लिने गरेको पनि श्रोतले खुलासा गरेको छ । यसरी नेपालले नेपाली खेलाडीहरुलाई मात्र दिन मिल्ने कुकिवनको सर्टिफिकेट गुरुङ्गले विदेशी भारतीय नागरिकलाई बेचेर नेपाल तेक्वान्दो संघलाई व्यापार गर्ने अखडा बनाएको प्रस्ट हुन्छ ।
नियम कानुन सम्मत विदेशी नागरिकलाई कुकिवनमा डानको लागि सिफारिस नै गर्न मिल्दैन । तर गुरुङ्गले नियम कानुनको खिल्लि उडाउँदै हचुवाको भरमा डान सर्टिफिकेटको लागि कुकिवानमा सिफारिस गरेका हुन् । गुरुङ्गले सन् २००६ मा मात्रै विना प्रक्रिया सयौं भारतीय नागरिकहरुलाई डानको लागि सिफारिस गरेको प्रमाण मेरोखेल डटकमलाई प्राप्त भएको छ । जुन कुराले गुरुङ्ग तेक्वान्दोको विकासको लागि नभई व्यक्तिगत विकासमा लागेको कुरालाई प्रमाणित गर्छ । अर्को कुरा गुरुङ्ग चार दशकभन्दा बढीको समयदेखि तेक्वान्दोमा किन टाँसिइरहेका छन् र अँझै किन टाँसिन चाहन्छन् त्यसको समेत पर्दाफास भएको छ ।
गुरुङ्गले सन् २००६ मा भारतीय नागरिक बुद्धदेव दत्त, कमलेस सरकेर, तरुण मजुन्दार, राजकिशोर परिडा, रोहित सधुखन, रुप कमल नन्दी, सुजय राहा, सोहम सधुखन र सुलभ मित्रा समेतलाई विभिन्न डान प्राप्तिका लागि कुकिवनमा सिफारिस गरेका थिए । यसरी कुनै प्रक्रियाबिना आर्थिक चलखेलमा कुकिवनको सर्टिफिकेट पाउने व्यक्तिहरु प्राय सबै भारत कोलकोता निवासी छन् । उनीहरुलाई गुरुङ्गले पहिलो र दोश्रो डानको लागि कुकिवनमा सिफारिस गरेका थिए । जब कि स्वदेशी खेलाडीहरुलाई कुकिवनको डान प्राप्त गर्न विभिन्न प्रक्रिया र चरणहरुको पार गर्नुपर्छ । त्यसमा सफल भएपछि मात्रै सिफारिसको प्रक्रिया अगाडि बढाइन्छ ।
तर ती विदेशी भारतीय नागरिकहरुलाई भने कुनै प्रक्रिया नै नपुर्याई हचुवाको भरमा दीपराजले आफुले हस्ताक्षर गरेर सिफारिस गरेको देखिन आएको छ । यहाँ सोचनिय कुरा के छ भने एउटा देशले अर्को देशको नागरिकलाई सिफारिस गर्र्दा कुकिवनले कसरी डान सर्टिफिकेटको प्रमाणपत्र प्रदान गर्यो ? त्यो अहिले समझभन्दा बाहिरको कुरो बनेको छ । कुकिवनको यस्तो कार्य शैलीले अहिले कुकिवनको विश्वसनियतामा समेत प्रश्नचिन्ह खडा गरिदिएको छ । अन्यथा नियम कानुन विपरित विदेशी नागरिकलाई कुकिवनले कसरी प्रमाणपत्र दिन मिल्छ त ? अहिले यो छानविनको विषय बन्न पुगेको छ । सम्बन्धित निकायले यसको सुक्ष्मरुपमा अध्ययनगरि तेक्वान्दोलाई अवैध व्यापारको धन्धा बनाउने गुरुङ्गलाई कानुनी कठघरामा उभ्याउनु जरुरी भइसकेको छ ।
यसर्थमा कि गुरुङले भारतीय नागरिकहरुलाई कुकिवनमा सिफारिस गर्दा डान प्राप्त गर्ने कुनै किसिमको प्रक्रिया अपनाएको देखिदैन् । उनले सिधै पैसा कुम्ल्याउँदै उनीहरुलाई सर्टिफिकेटको लागि सिफारिस गरेको प्रस्टरुपमा देखिन्छ । यी त उदाहरण मात्रै हुन, यस्ता हजारौं सर्टिफिकेट बेचेको गुरुङ्गमाथि अहिले आरोप लागेको छ । त्यस्तो हरकतलाई अन्जाम दिन अहिले पनि गुरुङ्गले तेक्वान्दो संघकै एक दुई व्यक्तिलाई आफ्नो दाहिने हातको रुपमा प्रयोग गरिरहेको श्रोतको दाबी छ । उनीहरुले नै दार्जिलिङ्गमा भारतीय नागरिकसँग साँठगाँठगरि यस्तो तारतम्य मिलाउँदै आएको पनि बुझिन आएको छ ।
आफुलाई नेपाली तेक्वान्दोको मसिहा ठान्ने दीपराज गुरुङ्गले तेक्वान्दो खेलको आडमा गरेको यो कर्तुतले उनी तेक्वान्दोको विकास भन्दा व्यक्तिगत विकासमा लागेको प्रस्ट हुन्छ । यदि कोहि जिम्मेवार व्यक्ति नियम विपरित चल्छ भने त्यसले कानुनको अपहेलना गरेको मानिन्छ । यहाँ महासचिव गुरुङ्गले तेक्वान्दोमा रहँदा गरेको गैरकानुनी कार्यले तेक्वान्दोलाई मात्र नभई खेलकुदलाई नै कमाई खाने श्रोत र साधनको रुपमा उपयोग गरेको प्रस्टरुपमा देखिएको छ । तसर्थ यस्तो नियम विपरित गैरकानुनी कार्य गर्नेलाई सम्बन्धित निकाय राष्ट्रिय खेलकुद परिषदले नाकमा रस्सी लगाउदै आवश्यक कारवाहि गर्नु अहिलेको आवश्यकता भईसकेको छ । हेरौं, भरखरै दुवै तेक्वान्दो संघलाई खारेज गरेर वाहवाही बटुलेको राखेपले अब गुरुङ्ग माथि कस्तो किसिमको कारबाहि अगाडि बढाउँछ ?
कुनै पनि राष्ट्रिय संघ संस्थागत रुपमा चल्नु पर्दछ । नियम कानुनले पनि यहि कुरा भन्छ । तर नेपाल तेक्वान्दो संघ वर्षौँदेखि संस्थागत नभई व्यक्तिगतरुपमा चलिरहेको कसैबाट छिपेको छैन् । जसलाई दीपराज गुरुङ्गले आफ्नो सोच अनुसार चलाई रहेका छन् । उनको यहि सोच संस्थामा हावी हुँदा उनी दिनप्रतिदिन तेक्वान्दोमा तानाशाही बन्दै आएका छन् । अन्यथा एउटै संस्थामा चार दशकभन्दा बढीको समयसम्म गुरुङ्गले कदापी राज गर्ने थिएनन् । अहिले गुरुङ्गको तानाशाहीको विरासतलाई जगैबाट उखेल्न राखेपले जुन कदम चालेको छ, त्यसले तेक्वान्दोमा शुद्धिकरण हुने विश्वास गर्न सकिन्छ । यतिबेला न्यायालयले कारण देखाउ आदेश गरेर छलफलको लागि समय दिएको अवस्था छ । आशा गरौं, तेक्वान्दोले दीपराजको कालो छाँयाबाट अवश्य मुक्ति पाउने छ ।
