इङ्गलिस प्रिमियर लिग फुटबल अन्तर्गत मंगलबार राति सम्पन्न खेलमा आर्सनलले नाटकीय जित हासिल गरेको छ । केनिलवर्थ रोड स्टेडियममा भएको खेलमा आर्सनलले घरेलु टोली लुटन टाउनबिरुद्ध ४-३ गोल अन्तरको नाटकीय जित हासिल गरेको हो ।
बराबरीतर्फ उन्मुख खेलमा आर्सनललाई जित दिलाउन डेक्लन राइसले इन्जुरी समयमा हेडमार्फत निर्णायक गोल गरे । आर्सनलले २० औं मिनेटमा गेब्रियल मार्टिनेलीको गोलबाट खेलमा शुरुवाती अग्रता लिएको थियो ।
२५ औं मिनेटमा घरेलु टोलीका गेब्रियल ओशोले हेडमार्फत गोल गर्दै खेललाई बराबरी अवस्थामा ल्याए । ४५ औं मिनटमा गेब्रियल जिससले गोल गर्दै आर्सनललाई पहिलो हाफमा २–१ को अग्रता दिलाएका थिए ।
दोश्रो हाफको शुरुवाती समयमै लगातार दुई गोल गर्दै लुटनले ३-२ को अग्रता कायम गर्यो । उसका लागि एलिजा एडेबायोले खेलको ४९ र रोस बार्कलेले ५७ औं मिनटमा क्रमश: गोल गरे ।
६० औं मिनेटमा काइ हभार्टजले आर्सनलका लागि बराबरी गोल फर्काएका थिए । त्यसपछि खेल बराबरीमा सकिनेतर्फ केन्द्रित बनेको थियो । तर मार्टिन ओडेगार्डको क्रसमा राइसले इन्जुरी समयको अन्तिम मिनेटमा डमार्फत गोल गर्दै आर्सनलाई जित दिलाउन सफल भए ।
जितसँगै १५ खेलबाट ३६ अंक जोडेको आर्सनल तालिकाको शीर्ष स्थानमा छ । यता पराजित लुटन समान खेलमा ९ अंकसहित रेलिगेशन जोन भन्दा एक स्थान माथि अर्थात् १७ औं स्थानमा रहेको छ ।
