काठमाडौं। आठौं प्रधानमन्त्री कप एनभिए महिला तथा पुरुष भलिबल लिगमा शनिबार उपाधिको टुंगो लाग्ने भएको छ।
त्रिपुरेश्वस्थित राष्ट्रिय खेलकुद परिषद् (राखेप) को कभर्डहलमा शनिबार फाइनल र तेस्रो स्थानका लागि खेल हुने भएको हो।
पहिलो खेल महिलातर्फ तेस्रो स्थानका लागि विभागीय डर्बीमा सशस्त्र प्रहरी बलको एपीएफ क्लब र त्रिभुवन आर्मी क्लब भिड्ने छन्। यो खेल बिहान आठ बजे शुरु हुनेछ।
यो खेल सकिएसँगै पुरुषतर्फको तेस्रो स्थानका लागि विभागीय डर्बीमै पुलिस र आर्मी भिड्ने छन्।
महिलातर्फको उपाधिका लागि दिउँसो १ बजे एभरेस्ट भलिबल क्लब र विभागीय टोली नेपाल पुलिस क्लब खेल्ने छन्।
यो खेल सकिएसँगै गण्डकी प्रदेश भलिबल एसोसिएसन र हेल्प नेपाल पुरुषतर्फको उपाधिका लागि प्रतिस्पर्धा गर्नेछन्।
नेपाल भलिबल संघ (एनभिए) को आयोजनामा जारी प्रतियोगितामा पुरुषतर्फ ८ टोली र महिलातर्फ ६ टोली सहभागी थिए। लिगमा पुरुषतर्फ २८ खेल र महिलातर्फका १५ खेल शुक्रबार सकिएको थियो।
प्रतियोगिताको महिला तथा पुरुष दुवैतर्फको विजेता, उपविजेता र तेश्रो हुने टोलीले रु. ८ लाख, ४ लाख र २ लाख नगद पुरस्कार प्राप्त गर्नेछ। त्यस्तै विधागततर्फ सर्वोत्कृष्ट महिला तथा पुरुष खेलाडीले समान ५० हजार, उत्कृष्ट लिब्रो, सरभर, ब्लकर, लिफ्टर, स्पाइकर र टिम प्रशिक्षकले जनही रु. २०-२० हजार प्राप्त गर्ने छन् ।