काठमाडौं । लेबनानमा हुने महिला फोर नेसन्स कप फुटबल २०२४ का लागि नेपालको टोली घोषणा भएको छ ।
अखिल नेपाल फुटबल संघ (एन्फा) का अनुसार राष्ट्रिय महिला फुटबल टोलीका मुख्य प्रशिक्षक राजेन्द्र तामाङले बुधबार २२ सदस्यीय नेपाली टोलीको घोषणा गरेका हुन् ।
महिला फोर नेसन्स कप जुलाई ६ देखि १६ अर्थात् असार २४ देखि साउन १ गतेसम्म लेबनानमा आयोजना हुँदैछ । नेपालले आफ्नो पहिलो खेल जोर्डनसँग असार २६ गते खेल्ने छ ।
यस्तै नेपालले आफ्नो दोश्रो खेल असार २९ गते बंगलादेश र तेश्रो खेल साउन १ गते घरेलु टोली लेबनानसँग खेल्ने छ । नेपालको पहिलो र दोश्रो खेल नेपाली समयानुसार राति १:४५ र तेश्रो खेल साँझ ७:४५ बजे शुरु हुनेछ ।
प्रतियोगिताका सबै खेल त्रिपोली अन्तर्राष्ट्रिय फुटबल मैदानमा हुनेछन् । सहभागी सबै टोलीले एक अर्कासँग एक एक खेल खेलपछि शीर्ष स्थानमा रहने टोलीले उपाधि जित्ने छ ।
नेपाली टोलीः
गोलकिपर : अन्जिला तुम्बापो सुब्बा, अञ्जना राना मगर र उषा नाथ
डिफेन्डर : अमृता जैशी, गीता राणा, हिरा कुमारी भुजेल, विमला विक, निशा ठोकर, पूजा राना र समीक्षा घिमिरे
मिडफिल्डर : रेणुका नगरकोटी, सरु लिम्बु, अनिता बस्नेत, सविता राना मगर, दीपा शाही, अनिता केसी, प्रीति राई, अमिषा कार्की र विमला चौधरी
फरवार्ड : सावित्रा भण्डारी, रेखा पौडेल र रश्मीकुमारी घिसिङ
