काठमाडौं । नेपालको त्रिभुवन आर्मी फुटबल क्लबले भारतमा जारी प्रतिष्ठित डुरान्ड कप २०२४ मा लगातार दोश्रो हार व्यहोरेको छ । समूह एफ अन्तर्गत बिहीबार भएको खेलमा आर्मी एफसी गोवासँग २-१ गोल अन्तरले पराजित भएको हो ।
गोवाको जितका लागि अबाविहा र सिट्रोयले गोल गर्दा आर्मीका वसन्त जिम्बाले एक गोल फर्काए । खेलको शुरुवाती पहिलो मिनेटमै अबाविहाको गोलबाट गोवाले अग्रता लिएको थियो ।
५० औं मिनेटमा सिट्रोयले गर्दै गोवालाई २-० को अग्रता दिलाए । त्यसपछि खेलको ६६ औं मिनेटमा आर्मीका वसन्तले एक गोल फर्काएपनि गोवा २-१ ले विजयी भयो ।
लगातार दोश्रो हार व्यहोरेको आर्मी अंक विहिन छ । यसअघि आर्मी आफ्नो पहिलो खेलमा सिलोङ लाजोङ फुटबल क्लबसँग १-० गोलले पराजित भएको थियो ।
यता गोवाको भने यो लगातार दोश्रो जित हो । उसले दुई खेलबाट ६ अंक जोडेको छ । गोवाले आफ्नो पहिलो खेलमा रंगदाजीद युनाइटेडलाई ४-३ ले पराजित गरेको थियो।
आर्मीले समूह चरणको तेश्रो तथा अन्तिम खेल साउन २९ गते हैदरावादसँग खेल्नेछ । लिग चरणको समाप्तिपछि प्रत्येक समूहको शीर्ष स्थानमा रहने टोली नकआउट चरणमा पुग्नेछन् ।
त्यस्तै ६ समूह मध्येबाट उत्कृष्ट २ उपविजेता टोलीले क्वार्टरफाइनलमा स्थान पक्का गर्नेछन्।
