काठमाडौं । राष्ट्रिय खेलकुद परिषद् (राखेप) ले करातेका नायव वरिष्ठ प्रशिक्षक दीपक श्रेष्ठलाई कराते खेलको मुख्य प्रशिक्षकमा नियुक्त गरेको छ । लामो समयदेखि करातेको मुख्य प्रशिक्षक नियुक्ति हुन सकेको थिएन ।
करातेमा लामो समयदेखि मुख्य प्रशिक्षक नियुक्ति हुन नसक्दा विवाद उत्पन्न समेत भएको थियो । सोहि कुरालाई दृष्टिगत गर्दै राखेपले सदस्य सचिवस्तरिय निर्णय गर्दै करातेको मुख्य प्रशिक्षकमा दीपक श्रेष्ठलाई नियुक्त गरेको हो ।
श्रेष्ठ यसअघि करातेको सहायक मुख्य प्रशिक्षकको रुपमा कार्यरत थिए । केहि महिनाअघि करातेका मुख्य तुलसी महर्जनले उमेर हदका कारण अवकास पाएपछि मुख्य प्रशिक्षकको पद खालि रहेको थियो ।
ढिलै भएपनि राखेपले उक्त पदमा श्रेष्ठलाई नियुक्त गरेर पूर्णता दिएको छ । राष्ट्रिय खेलकुद परिषदका सदस्यसचिव टंकलाल घिसिङ्गले श्रेष्ठलाई नियुक्ति प्रदान गरेका थिए ।
