काठमाडौं । नेपाली मुवाँथाई खेलाडी पलिस्था कक्षपतिले आईएफएमए युथ वर्ल्ड च्याम्पियनसिप खेल्ने भएकी छिन् । प्रतियोगिता सेप्टेम्बर ११ देखि २० तारिखसम्म थाइल्यान्डको बैंककमा हुनेछ । पलिस्थाले महिला ४५ केजीमुनि तौलसमूहमा नेपालको चुनौती प्रस्तुत गर्ने छिन् ।
पलिस्थाले सन् २०१९ मा थाइल्यान्डमै भएको विश्व मुवाँथाई च्याम्पियनसिपको एमेच्योरतर्फ महिला ३५ केजीमुनि स्वर्ण जितेकी थिइन् । पलिस्थाले विभिन्न समयमा भएको इन्डो–नेपाल मुवाँथाई च्याम्पियनसिपमा ३ स्वर्ण जितेकी थिइन् ।
पलिस्थासहित प्रतियोगितामा ३ सदस्यीय टोली सहभागी हुनेछ । पलेशा र प्रशिक्षक गणेशलाल कक्षपति सोमबार थाइल्यान्ड प्रस्थान गर्दै छन्।
उनीहरुलाई राष्ट्रिय खेलकुद परिषद्अन्तर्गत प्रचार प्रसार शाखाका प्रमुख खुशराज दाहालले आइतबार एक कार्यक्रमबीच बिदाइ गरे । व्यवस्थापक निलम अधिकारी थाइल्यान्ड पुगिसकेका छन् ।
