काठमाडौं । श्रीलंकाको कोलम्बोमा जारी यू-१९ महिला भलिबल च्याम्पियनसिपमा नेपालले सुरुवाती खेलमै निराशाजनक हार व्यहोरेको छ। मंगलबार भएको खेलमा नेपाल किर्गिस्तानसँग ३-२ को सेटमा पराजित भएको हो।
पहिलो सेट २५-२२ ले जित्दै उत्कृष्ट सुरुवात गरेको नेपाली टोलीले दोस्रो सेट १४-२५ ले गुमायो । त्यसपछि तेस्रो सेटमा २५-१८ को सहज जित निकाल्दै नेपालले २-१ को अग्रता बनाएको थियो।
तर, चौथो सेट किर्गिस्तानले २२-२५ ले जित हात पार्दै खेललाई निर्णायक पाँचौं सेटमा पुर्यायो । निर्णायक सेटमा किर्गिस्तानले बलियो प्रदर्शन गर्दै १५-९ ले नेपाललाई पराजित गर्यो।
हारसँगै नेपालले प्रतियोगिताको पहिलो खेलबाट १ अंकमा सिमित रहँदा विजेता किर्गिस्तानले २ अंक जोड्न सफल भएको छ।
अब नेपालले आगामी खेलमा बुधबार घरेलु टोली श्रीलंकासँग प्रतिस्पर्धा गर्नेछ। नेपालको लक्ष्य दोस्रो खेलमा जित निकाल्दै सेमिफाइनलमा प्रवेश गर्ने सम्भावना जीवित राख्ने रहनेछ।
