फिफा विश्वकप २०२६ अन्तर्गत मंगलबार बिहान हुने अन्तिम १६ को खेलमा अमेरिकाले बेल्जियमसँग प्रतिस्पर्धा गर्नेछ । खेल सिएटल स्टेडियममा नेपाली समयअनुसार बिहान ५:४५ बाट शुरु हुनेछ।
सन् २०१४ को विश्वकपमा बेल्जियमसँग २-१ ले पराजित हुँदै अन्तिम १६ बाट बाहिरिएको अमेरिकासामु यसपटक त्यस हारको बदला लिने अवसर छ।
सन् २०१४ को उक्त खेलमा अहिलेको अमेरिकी टोलीका कुनै पनि खेलाडी सहभागी थिएनन् । तर बेल्जियमका थिबो कोर्टुवा, केभिन डी ब्रुइने, रोमेलु लुकाकु र एक्सेल विट्सेल त्यस टोलीका सदस्य थिए।
त्यस खेलमा डी ब्रुइनेले ९३ औं मिनेटमा र लुकाकुले १०५ औं मिनेटमा गोल गर्दै बेल्जियमलाई जित दिलाएका थिए। यसपटक अमेरिका उत्कृष्ट लयमा देखिएको छ।
उसले नकआउट चरणमा बोस्निया एन्ड हर्जेगोभिनालाई २-० ले पराजित गर्दै विश्वकप इतिहासमा दोस्रो पटक नकआउट खेल जितेको हो । यसअघि अमेरिकाले सन् २००२ को विश्वकपको अन्तिम १६ मा मेक्सिकोलाई २-० ले हराएको थियो।
बोस्नियाविरुद्धको खेलमा अमेरिकाका प्रमुख स्ट्राइकर फोलारिन बालोगुनले ६४ औं मिनेटमा रातो कार्ड पाएका कारण उनी अन्तिम १६ को खेल गुमाउने अनुमान गरिएको थियो । तर आइतबार फिफाले उनको निलम्बन हटाउँदै बेल्जियमविरुद्ध खेल्न अनुमति दिएपछि अमेरिकी टोलीलाई ठूलो राहत मिलेको छ।
बालोगुनले यस विश्वकपमा खेलेका तीन खेलमा तीन गोल गरेका छन् । उनी अमेरिकी आक्रमणको मुख्य आधार मानिन्छन्। उनको टोलीमा पुनरागमनले अमेरिकाको सम्भावना अझ बलियो बनेको विश्लेषण गरिएको छ।
यता बेल्जियम पछिल्ला चार विश्वकपमध्ये तेस्रो पटक अन्तिम १६ मा पुगेको हो । तर उसको यात्रा सहज भने रहेन । राउन्ड अफ ३२ मा सेनेगलविरुद्ध ८५ औं मिनेटसम्म २-० ले पछि परेको बेल्जियमले तीन मिनेटभित्र दुई गोल गर्दै खेल बराबरी गरेको थियो।
त्यसपछि अतिरिक्त समयमा युरी टिलेमान्सले पेनाल्टीमार्फत निर्णायक गोल गर्दै बेल्जियमलाई रोमाञ्चक जित दिलाएका थिए । यो विश्वकप इतिहासकै उल्लेखनीय पुनरागमनमध्ये एक मानिएको छ।
बालोगुनको उपलब्धताले अमेरिकी टोलीको सम्भावना उल्लेखनीय रूपमा बढाएको छ । उत्कृष्ट लयमा रहेको अमेरिका यसपटक बेल्जियमलाई पराजित गर्दै क्वार्टरफाइनलमा स्थान बनाउने दाबेदारका रूपमा हेरिएको छ।
