विश्व फुटबलको सर्वोच्च निकाय (फिफा) का प्रमुख सञ्चालन अधिकृत (सिओओ) केभिन लामोरलाई पदबाट हटाइएको छ । अध्यक्ष जियानी इन्फान्टिनोको विवादास्पद योजनाको विरोध गरेपछि उनलाई पदबाट हटाइएको हो।
लामोरले निजी लगानीकर्तालाई विश्वकपका केही व्यावसायिक हिस्सामा लगानी गर्न दिने इन्फान्टिनोको योजनाको खुलेर विरोध गरेका थिए । उक्त योजना सार्वजनिक भएपछि फिफाभित्र र बाहिर व्यापक आलोचना भएको थियो । विरोध चर्किएपछि फिफाले जुलाई ३१ मा योजना स्थगित गरेको थियो।
योजना सार्वजनिक भएपछि लामोरले फिफाको प्रशासनलाई नै यस विषयमा भ्रममा पारिएको बताएका थिए । उनले इन्फान्टिनोले आफूलाई नै फिफा ठान्ने गरेको आरोपसमेत लगाएका थिए । फिफाको अध्यक्ष संस्था आफ्नै स्वार्थअनुसार चलाउने व्यक्ति नभई फिफाको सेवामा रहने व्यक्ति हुनुपर्ने प्रतिक्रिया पनि उनले दिएका थिए।
लामोरले आफ्नो धारणा सार्वजनिक गर्दा जागिर गुम्न सक्ने सम्भावना पनि बुझेका थिए । उनले त्यस अवस्थामा पनि आफूले निर्णय स्वीकार गर्ने बताएका थिए । उनले आफूले सही कुरा बोलेको विश्वास गर्दै जागिर गुमे पनि त्यसको पछुतो नहुने यसअघि नै संकेत दिएका थिए।
उनको त्यो अभिव्यक्तिपछि केही दिनमै फिफाबाट उनी बर्खास्त भएका हुन् । फिफाका महासचिव माटियास ग्राफस्ट्रोमले कर्मचारीहरूलाई इमेल पठाउँदै लामोरले संस्था छाड्न लागेको जानकारी दिएका थिए।
फिफाले १७ अगस्ट २०२६ मा लामोरसँगको कार्यसम्बन्ध औपचारिक रूपमा समाप्त भएको पुष्टि गरेको हो । फिफाले लामोरले दुई वर्षसम्म संस्थाका लागि गरेको कामका लागि धन्यवाद दिँदै उनको आगामी भविष्यका लागि शुभकामना दिएको छ । तर, उनलाई किन हटाइएको हो भन्ने विषयमा फिफाले थप जानकारी दिएको छैन।
लामोरले आफ्नो विरोधका क्रममा फिफाका कर्मचारीहरूको अवस्थाबारे पनि चिन्ता व्यक्त गरेका थिए । उनले आफ्ना सहकर्मीहरू अपमान र धम्कीको वातावरणमा काम गर्न बाध्य हुन नहुने बताएका थिए । फिफामा काम गर्ने कर्मचारीहरू आफ्नो संस्थाप्रति गर्व गर्न चाहने भए पनि पछिल्लो घटनाक्रमका कारण धेरै कर्मचारीमा त्यस्तो भावना नरहेको उनको भनाइ थियो।
लामोरले इन्फान्टिनोको योजनाको विरोध गरेको दिन नै इन्फान्टिनोका वरिष्ठ सल्लाहकारमध्ये एक कार्लोस कोर्डेइरोले पनि राजीनामा दिएका थिए । उनले पनि इन्फान्टिनोका प्रस्तावप्रति असहमति जनाएका थिए।
केभिन लामोरको बर्खास्तीलाई अझ महत्वपूर्ण मानिएको अर्को कारण उनी र इन्फान्टिनोबीचको पुरानो सम्बन्ध हो । लामोर फिफामा आउनुअघि युइएफएका उप-महासचिव थिए । उनी सन् २००७ मा युइएफएमा प्रवेश गरेका थिए र त्यहाँ इन्फान्टिनोसँगै काम गरेका थिए । करिब दुई वर्षअघि मात्र उनी फिफाको प्रमुख सञ्चालन अधिकृत बनेका थिए।
त्यसैले लामो समयदेखि इन्फान्टिनोसँग काम गर्दै आएका वरिष्ठ अधिकारीले नै उनको महत्वपूर्ण योजनाको सार्वजनिक रूपमा विरोध गर्नु फिफाभित्र गम्भीर मतभेद रहेको संकेतका रूपमा हेरिएको छ।
विश्वकपको व्यावसायिक हिस्सामा निजी लगानीकर्तालाई सहभागी गराउने योजना असफल भएपछि इन्फान्टिनोमाथि दबाब थप बढेको छ । उनको नेतृत्व र निर्णय गर्ने शैलीमाथि फिफाभित्र तथा बाहिरबाट प्रश्न उठिरहेका छन् । उनलाई पदबाट हटाउन दबाब दिने प्रयास समेत जारी रहेको बताइएको छ।
