काठमाण्डौं ।
नेपाली ब्याडमिन्टनका पूर्व खेलाडी तथा अम्पायर दिपक थापा खानेकुरामा निकै चासो राख्छन् । फुर्सदकोको समयमा आफै विभिन्न परिकार बनाउँछन् । कोरोना भाइरस (कोभिड–१९) को महामारीका कारण पाएको फुर्सदिलो समय उनले विभिन्न परिकार बनाएर बिताए । लकडाउनको समयमा प्रायः भान्छामा रमाउने उनी धेरैथरी परिकार बनाउन सक्छन् ।
झण्डै २० बर्ष अघि उनी अध्ययनको शिलशिलामा भारत पुगेका थिए । उनको पढाईको बिषय होटल व्यवस्थापन थियो । पढाई सकेर नेपाल फर्किए पछि ब्याडमिन्टनमा रेफ्रिको भुमिकामा देखा परेका उनी खानेकुरा बनाउनु आफ्नो अध्ययनको विषय ठान्छन् भने ब्याडमिन्टनलाई प्यासनको रुपमा लिन्छन् ।
विश्वभर महामारीको रुपमा फैलिएको कोरोना भाइरस (कोभिड–१९) ले नेपाल पनि नराम्रोसँग प्रभावित भयो । ३ महिना लामो लकडाउनले ब्याडमिन्टनका राष्ट्रिय तथा अन्तराष्ट्रिय प्रतियोगिता प्रभावित भयो । त्यसकारण उनले लामो फुर्सद पाए । यो समय कोरोना नभएको भए उनी कुनै अन्तर्राष्ट्रिय अथवा राष्ट्रिय ब्याडमिन्टन प्रतियोगितामा अम्पायरिङ गरिरहेका हुन्थे, तर कोरोनाले खेलहरु स्थगित भएपछि घरमा आफ्नो सिप देखाए ।
‘२० बर्ष अघि पढेको अनुभव थियो, त्यसलाई मैले फेरि ताजा गरेँ, थापाले भने, ‘परिवारकासाथ आफ्नो अध्ययनको सिप बाँड्ने मौका मिल्यो ।’ किताबका पाना पल्टाउदै विभिन्न परिकार बनाएको उनले सुनाए ।
ब्याडमिन्टनको अम्पायरिङ्गका लागि विभिन्न देश घुमी सकेका थापालाई विदेशमा पनि ट्रेड्शिनल र स्थानीय खोन कुरानै रुचाउँछन् । ब्राजिलको ब्ल्याक बिन्स् एण्ड राईस, चिनको हटपट, भियतनामको फो, कोरियाको बिबिम्वेप लगायत दर्जनौ देशका स्थानिय परिकार मनपर्ने सुनाए ।
थापा फिलिपन्स्को अडोपो,थाईल्याण्डको गुआए ट्यु, र फ्रान्स्को फैन्च ब्रेडले निकै आकर्षित गरेको बताउँछन् ।
अध्ययनको क्रममा भारतमा रहेको समयमा प्राय मटन बिर्यानी खाने गरेको र भारतको बिर्यानी अन्य कुनै देशको खाना भन्दा बढी मनपर्ने दिपक बताउँछन् । उनी भन्छन्,‘यद्यपी नेपालको पारम्परिक दाल भात र तरकारीको स्वादलाई कुनै पनि देशको खानाले जित्न चाँहि सक्दैन ।’
दिपकले आफैलाई चाँहि खानामा दाल, भात, खसीको ग्रेभी र टमाटरको अचार सबैभन्दा मनपर्ने बताए ।
अम्पायर थापाले लकडाउनदेखि प्राय दिनहु जसो साथीभाई र आफन्तलाई घरमै डाँकेर विभिन्न देशका परिकार पकाएर खानामा निम्तो गर्ने गरिरहेका छन् ।
ब्याडमिन्टनका अम्पायर समेत रहेका थापाको अनन्नय मित्र उदय अर्याल सुनाउँछन्,‘दिपकले बेला बेलामा गफ त दिन्थ्यो यस्तो पकाउँछु उस्तो पकाउँछु भनेर तर यो लकडाउनले दिपकको कुकिङ्ग कला देखेर म निकै प्रभावित भए । कुनै तारे होटलको भन्दा कम स्वाद थिएन उसले पकाएको खानामा । अद्भुत कुक रहेछ दिपक ।’
यसबाहेक पनि थापा अन्य धेरै काममा सकृय छन् । थापागाउँ सुधार समितिको अध्यक्ष समेत रहेका उनी अहिले थापागाउँमा पुर्नःनिर्माणको तयारीमा रहेको मन्दिर र पार्टी भवनको काममा ब्यस्त छन् ।
‘कोरोनाले ठुलो असर गर्यो, कतिपय बेफाईदासँगै कतिपय फाईदा पनि हातलागे’, थापाले भने, ‘मैले खानेकुरा पकाएर परिवारसँग मिठो समय बिताएँ भने टोल सुधारका लागि पनि बिभिन्न कामगर्न सकें ।’
